[2020-11-26]
O CONSELLO DA XUNTA AUTORIZA O CONSELLO DA XUNTA AUTORIZA UN NOVO PAGAMENTO DE 20 MILLÓNS DE EUROS DO FONDO ESTATAL DE COMPENSACIÓN ÁS EMPRESAS DE TRANSPORTE PÚBLICO POLA CAÍDA DA ACTIVIDADE POLA COVID-19
A Xunta, con esta achega e as anticipadas nos últimos meses, completa o importe total comprometido de máis de 28 millóns de euros
Trátase de achegar liquidez ao sector do transporte para poder garantir a prestación dos servizos públicos e manter os empregos
Os servizos de transporte de competencia autonómica rexistraron reducións de usuarios que acadaron o 95% nos momentos máis álxidos da emerxencia sanitaria
As compensacións que lle corresponden a cada concesionaria calcularanse segundo a diminución da demanda, os custos da adaptación dos servizos e o incremento dos custos de explotación por mor da crise sanitaria
O Consello da Xunta autorizou hoxe o acordo para realizar un novo pagamento de 20 millóns de euros do fondo estatal para compensar as empresas de transporte público pola caída da actividade derivada da covid-19.
O Goberno galego, con esta achega aprobada hoxe e os anticipos realizados nos últimos meses, completa o importe total comprometido de máis de 28 millóns de euros.
Con esta iniciativa, preténdese achegar liquidez ao sector do transporte para garantir a prestación dos servizos públicos e manter os empregos.
O fondo creado compensa a cada concesionaria o impacto da crise sanitaria desde a primeira declaración do estado de alarma ata o 31 de decembro de 2020.
Como consecuencia das restricións de mobilidade derivadas da covid-19, os servizos de transporte de competencia autonómica rexistraron reducións medias de usuarios que acadaron niveis superiores ao 95% nos momentos máis álxidos da emerxencia sanitaria.
Non obstante, as concesionarias deberon manter un volume de oferta de servizos axeitado para garantir a mobilidade das persoas e o seu acceso aos seus postos de traballo ou a outras actividades esenciais.
Ademais, a prestación dos servizos viuse afectada tamén polo reforzo das medidas de seguridade sanitaria, como a desinfección dos vehículos, a posta á disposición dos usuarios de xeles desinfectantes ou outras indicacións que se foron establecendo ao longo destes meses.
Neste sentido, a compensación a cada concesión calcularase segundo a diminución da demanda, os custos fixos a consecuencia da adaptación dos servizos autorizada pola Administración e o incremento dos custos de explotación por mor da crise sanitaria.
Unha vez aprobado o acordo, nun prazo de dez días a contar desde a entrada en vigor desta orde, a Dirección Xeral de Mobilidade comunicará ás concesionarias o importe que lle corresponde.
As empresas disporán dun prazo de cinco días, desde a comunicación da anterior información, para confirmar a aceptación da indemnización calculada pola Administración.
Sede:
C/ Laverde Ruiz nº 6 Bajo D
15701 Santiago (A Coruña)
Teléfono:
(981) 59 75 00
Fax:
(981) 59 86 20
Correo electrónico: